في البداية أحب أأكد معلومة ان منظار الرحم هو وسيلة تشخيص و علاج… و تعلمه سهل بس محتاج مجهود و محتاج كمان عينك تلقط و إيدك تنسق مع اللي بتشوفه على الشاشة..
الـ evidence بيقول ان تعليمه بيحتاج وقت أقل من باقي أنواع المناظير “Short Learning Curve” ..
يعني لازم يبقى عندي منظار رحم تشخيصي (Office hysteroscopy) في العيادة.. الاجابة أيوة.. يفضل … خصوصا لو بتشوف حالات نسا كتير …. يعني السونار مايغنيش؟ ده سؤال عميق عليه نزاع .. بس لما أبص بعيني جوة الرحم أفضل من السونار العادي ال 2 D عالأقل.. ده غير الجزء العلاجي اللي بيقوم بيه منظار الرحم في العيادة …
يعني امتى باحتاج أعمل منظار الرحم ؟
كل شكوى تتعلق بأمراض النسا حاتحتاج منظار رحم في مرحلة ما … يعني All Gynecological complaints
تعالوا نقسمهم كدة : حالات لا غنى عن الهستروسكوبي تشخيص و علاج: الحاجز الرحمي Müllerian anomalies و التصاقات داخل الرحم Asherman syndrome و اللحمياتPolyps و الأورام الليفية الحميدة داخل التجويف Submucous myomas و الأجسام الغريبة داخل الرحم (اللولب Missed IUD’ أو بواقي الحمل) و كي استئصال بطانة الرحم الداخلية Endometrial resection / Ablation
حالات يفضل استعماله عشان أسهل: اصلاح ندبة الشق القيصري CS scar defect – حمل في الشق القيصري CS ectopic – عينة من بطانة الرحم Endometrial biopsy– قسطرة تسليك قناة فالوب – Tubal cannulation- تعقيم فتحتي قناتي فالوب Tubal sterilization – حالات ما قبل الحقن المجهري IVF
حانتكلم بعد كدة بتفصيل أكتر عن كل حاجة من دول طيب فيه موانع اني أعمل هستروسكوب؟ بالنسبة لدكتور عنده خبرة أو بيشتغل تحت اشراف و بيتعلم ، الموانع قليلة.. طبعا الحمل نتأكد انه مش موجود باختبار حمل حتى لو الحالة لسة مخلصة الدورة…العدوى / الافراز الصديدي من الرحم Pyometra ماينفعش أعمل معاه هستروسكوب .. أعالجه الاول عشان ضغط السائل ماينشروش داخل تجويف البطن … غير كدة مافيش موانع.. حتى لو اشتباه سرطان بطانة رحم.. أيوة و مش بيزود معدل انتشاره…
كام واحد مننا عنده أوفيس في عيادته او بيشتغل بيه في مركز او مستشفى ..
