الوسائط المستخدمة في تمدد تجويف الرحم أثناء الهستروسكوب:
غاز: (ثاني أكسيد الكربون) استخدامه بيحتاج جهاز Insufflator خاص غير بتاع اللاباروسكوب و لا يمكن استعماله مع هستروسكوب جراحي (الدم حايمنع الرؤيا) و لا ينصح باستعماله (ACOG 2020) .
بالنسبة للسوائل، محتاجين سائل يكون شفاف و امتزاجه بالدم بسيط و ممكن نستعمله مع الكهربا الجراحية و مايعملش مشكلة لو دخل منه كمية في الدورة الدموية الأنواع المتاحة هيا:
1- سوايل موصلة (electrolytic) يعني تحتوي جزيئات موصلة فا ممكن توصل الكهربا و بالتالي لا يمكن استعمالها مع ال مونوبولار عشان ماينقلش الكهربا خلال جسم المريضة و أشهر مثال محلول الملح (normal Saline 0.9%) و محلول الرينجرز (Ringer’s lactate ) , و الاتنين بيحتووا على عنصر الصوديوم الموصل.
2- سوايل غير موصلة (non- electrolytic) يمكن استعمالها بأمان مع المونوبولار مثال الجلايسين (Glycine 1.5%) و الماء المقطر (Distilled sterile water) و الجلوكوز (Dextrose 5%).
باقي السوايل اللي بنسمع عنها زي الـ Hyskon – Mannitol .. etc مالهاش دور حالياً (Obsolete) لانها قد تسبب مشاكل أو لاننا مش محتاجين أكتر من اللي فوق دول..
يعني الجلايسين هو الأكثر استخداما مع ال monopolar resectoscope و الملح مع ال Bipolar
لو حالة طويلة و خاصة لو فيها انكشاف لأجزاء كبيرة من بطانة الرحم و الأوعية اللي تحتها زي مثلا (Endometrial resection – Large myomectomy – Long septum)، بيدخل كميات من السائل للدورة الدموية … لازم تتحسب بدقة و نعرف الفاقد (deficit) اللي هوا الفرق بين اللي داخل (كام عبوة ملح أو جلايسين ) و الخارج (في وعاء التجميع أو برطمان الشفط) .
الفاقد ده مبدئياً لا نسمح له يتجاوز 1000 مل في حالة استخدام الجلايسين أو 2500 مل في حالة الملح … ساعتها بنوقف الهستروسكوب قطعياً حتى لو مكملش.
و إلا الحالة تدخل في مشاكل كبيرة تعرف ب ( Intravascular absorption or TURP syndrome)
ببساطة شديدة: لو السائل أيا كان دخل الدم بكميات كبيرة حايعمل زيادة في حجم الدورة الدموية (Circulatory overload) وده ممكن يأثر على عضلة القلب وكمان بيعمل تخفيف لتركيز الدم و للعناصر اللي فيه و أهمهاالصوديوم (Dilutional hyponatremia) طبعا ده أكتر بكتير مع الجلايسين لأن الملح يحتوي بالفعل على صوديوم …
لما الصوديوم يقل تركيزه، الخلايا حاتسحب الميه من الدم عشان تحاول تعلي تركيزه و ده حايعمل انتفاخ في الأنسجة (Tissue Edema) أهمهم الرئة و المخ (Pulmonary / Brain Oedema) الميه عالرئة حاتقلل تشبع الأكسجين في الدم (Low Oxygen saturation) و ده بيبان على مونيتور التخدير … المخ لما يبدأ الارتشاح فيه بيبقى مرحلة متأخرة و قد تكون قاتلة … اخر حاجة زيادة بيعملها الجلايسين بس ان الأمونيا الناتجة عن الميتابوليزم بتاعه في الكبد ممكن تعمل تسمم أمونيا و غيبوبة (Ammoniacal encephalopathy).
ملحوظة: 1 لتر جلايسين فرق (يعني الحد الأقصى اللي قلنا عليه) يعادل 10 مليمول /لتر انخفاض في صوديوم الدم (اللي بتبدأ عنده المشاكل)
علاجه ايه : اننا نحاول نتجنب حدوثها عن طريق قياس الفاقد مع كل لتر داخل في أي حالة حاتستهلك أكتر من 2 لتر سائل … لو وصلت للفاقد أوقف المنظار فورا.. لو كان بالفعل حصل فاقد زيادة .. دكتور التخدير يدي Diuretics و نركب قسطرة فولي و نتابع ال Urine output و نعمل صوديوم في الدم و نشوفه كام لو قليل جدا.. الحالة ممكن تحتاج عناية مركزة ..
الحالات في الأغلب بتعدي كويس طالما وقفنا المنظار في الوقت المناسب و ال SPO2 ماتأثرش وبالتالي محصلش ارتشاح في المخ ..
